كيفاش نفهمو الإسلام بالاستقراء
محمد الحمّار
الخمر حلال وإلا حرام؛ الميراث في القرآن مسألة حَرفية وإلا فيها اجتهاد؛ إقامة الصلاة عبادة وإلا تدعيم للعبادة اللي هي إتّباع الصراط المستقيم؛ ثمة وإلا ماثماش دولة إسلامية في الإسلام؛ القاتل لازم يتقتَل وإلا لا؛ السارق لازم تتقطَع يدّو وإلا لا؛ الفائدة البنكية راهي ربا وإلا لا؛ تعدد الزوجات ممكن وإلا لا؛ ارتداء الحجاب واجب ديني وإلا لا؛ إلى آخره من المواضيع اللي المسلمين ماهمش متفقين عليهم.
الخمر حلال وإلا حرام؛ الميراث في القرآن مسألة حَرفية وإلا فيها اجتهاد؛ إقامة الصلاة عبادة وإلا تدعيم للعبادة اللي هي إتّباع الصراط المستقيم؛ ثمة وإلا ماثماش دولة إسلامية في الإسلام؛ القاتل لازم يتقتَل وإلا لا؛ السارق لازم تتقطَع يدّو وإلا لا؛ الفائدة البنكية راهي ربا وإلا لا؛ تعدد الزوجات ممكن وإلا لا؛ ارتداء الحجاب واجب ديني وإلا لا؛ إلى آخره من المواضيع اللي المسلمين ماهمش متفقين عليهم.
عندي جواب أو موقف من بعض المواضيع هاذم، لكن الأهم (في التطرق متاعي لعلاقة الإسلام بالواقع متاعنا، كيفاش هي وكيفاش تكون أفضل)، موش أني نعطي رأيي في هاك المواضيع إنما الأهم أني، بصيفتي متخصص في البيداغوجيا متاع تعليم اللغة، وبصيفتي نعتبر مُحكم التنزيل والرسالة المحمدية لغة تِتقرَى ؛"اقرَأ باسمِ ربِّكَ"؛ وتِتفهِم وتِتقال، أي تِتطَّبّق (الكلام= فعل وعمَل، في علم اللسانيات)، الأهم أني نساهم بطريقة أو منهجية أو مقاربة تخَلي المسلم يتعَلم وحدو كيفاش يفهم، أو يزيد يفهم، هاك المواضيع الشائكة وغيرها، يفهمها بالاعتماد على العقل متاعو و الإحساس (الحَدس خاصة) متاعو.
أما الأداة اللي نقترحها على المسلم بش يقرا الرسالة المقدسة ويفهمها ويقول بيها ويعمل بيها فهي الاستقراء. الاستقراء بالفرانسوية والانقليزية هو ال induction. وهو عكس أداة الاستخراج أي déduction.
معنتها المسلم يزّيه من "قال المفسر الفُلاني"، ومن "استدل العالم الفلاني" الخ.
معنتها المسلم ينَجم يفهم الدين متاعو بواسطة الإختلاء بنفسو. يُوزن مليح الموضوع X أو Y، يحِس بيه، يِتمَثلو، يدَوّرو مليح في العقل متاعو، ويسئل نفسو يا هل ترى هو كإنسان، مثلاً ينَجم يتعاطى المسكرات من غير ما يدخل بعضو ومن غير ما يفقد البوصلة ومن غير ما يظلم الناس، وإلا لا. بالطريقة هاذي آنا متأكد اللي هالشخص بش يُخرج بحُكم يخُصو هو وربما يخُص الناس اللي كيفو. أو يسئل نفسو يا هل ترى ينَجم يتزَوج بثانية من غير ما يتألم هو ويتسَبب في تألم وحدة من الزوجتين وإلا الاثنين، ومن غير ما يعلن إفلاسو العاطفي أو الجسدي أو المالي أو الأُسري أو الاجتماعي، أو كلهم قَطع لَفّ. بالطريقة هاذي آنا متأكد اللي هالشخص بش يُخرج بحُكم يخُصو هو بالذات وربما يخُص الرجال اللي كيفو.
هكة، المسلم ينَجم يسَلكها خير من وقت اللي يسئل شيخ أو إمام أو حتى علاّمة متاع علوم شرعية ، على خاطر الشيخ أو الإمام أو العلاّمة بش يضُرو أكثر من اللي بش ينفعو. على خاطر الشيخ وما شابهو ماهوش هو، وهو ماهوش الشيخ. وعلى خاطر الشيخ ينَجم يَعمل عليه إسقاط projection، يعني يمِل عليه الفهم متاعو، اللي حافظو حفاظة وعُمرو ما عدّاه على غربال الاستقراء. وينَجم الشيخ حتى يمَرِّرلو الرغبات متاعو هو أو التخوفات متاعو هو.
28°
18°
Comments
0 de 0 commentaires pour l'article 308965