بقلم / منجي باكير

يظهرلي أكبر بليّة ان تكون موظفا مع هذه الحكومات ، الموظف البهيم القصير متاع الحكومة ، في كل لمّة و كل وقفة هو الاول ، القصاص من غادي لغادي لا يشاوروا و لا يناوروا ، الموظف الاسم العالي والمربط الخالي ، نهارين سردوك و الباقي دجاجة ، هو اللي يخدّم في البنوك و يحرّك في الاقتصاد و هو في ذاتو عايش - بسطاجي - في الوسط ، كل شيء يزيد هرولة إلا الشهرية زحفا ، شهريتو كيف مال اليتيم كل واحد طامع فيها ، إذا زادوا فيها شوية تتجندلها من كل ڨبيلة البانكة و الصنايعية و التجار و البحارة و احيانا تزيد معاهم دار الضوء و دار الماء ، حاصيلو الموظف برجو بالحوت متّاكل و مذموم ، الكسابة تكسب و النهابة تنهب وهوّ يخلّص و راس البين دادا عيشة ، الماكلة على التّرد و العياط ع الزّرزور و راس الموظف قريب للحكومة تحجملو قرعة و تخليلو زلّومة ...