"يا رب لك الحمد و الشكر.
أصدرت محكمة الإستيناف بباريس منذ قليل حكمها في قضية العياري ضد البلكاني.
خسر جوليان بلكاني و بانارو للطاقة، للمرة الثانية قضيتهم الي رفعوها ضدي.
خسرو في الجزائي و في المدني، إبتدائيا و إستئنافا.
قضاة فرنسيس، لقاو الي كلامي و خدمتي، لافيها ثلب و لا البلكاني عندو الحق يطلب عليها صوردي تعويض (كان طالب 100 ألف أورو 😁)
القضايا الكل حتى لتو في فرانسا ربحتهم، على عكس القضايا في تونس، رغم إنه المؤاخذات هي نفسها ديما : خدمتي لفائدة بلاد ما تحبش الخدامة، حبي لبلاد ما تحبش الي يحبوها.
على كل، ما نحبش نشكر السلطة التونسية الهاملة، بجميع اذرعها، من الرئيس المنقلب و إنت هابط، الي ما ساهمت في حتى شي في هالعركة، عركة الدفاع على شرف البلاد و برلمان البلاد و حق نواب البلاد في الدفاع على ثروات البلاد و حقوق العباد.
ما نحبش نشكر أحزاب الكاكاوية، الي ما ساندتنيش حتى قبل الانقلاب.
كانت عركة مرة، تكلفت برشة جهد و أعصاب و فلوس.
الحمد لله، هاني ربحت، يقعد الكله حديث و عارهم أطول من أعمارهم.
شكرا لنساء و رجال أمل و عمل، الي عاونوا بالي قدروا، بالكلمة الطيبة و المساهمة في دفع تكاليف التقاضي الي كانت برشة، ممتن لكم جدا، شرف برلمان بلادكم ممتن لكم جدا : عركة ضد شركة بترولية بإمكانيات لا محدودة، عركة داوود ضد جالوط و بتوفيق من ربي ربحنا.
شكرا لكل تونسي عاونا حتى بدعيوة خير، حتى بكليمة خير، هاك الكليمات، التعليقات، كانت تعاون فينا برشة باش يقعد المورال طالع.
هوكا القضاء الفرنساوي، قلكم إبتدائيا و إستئنافيا، مدنيا و جزائيا : خدمة العياري نظيفة و لا غبار عليها، لاهي ثلب و لا تشهير و لا ريق، بل خدمة نائب (سابق) حب بلاده و خدمها.
يا رب لك الحمد كثيرا."