المعارضة لم تنجح لأن الكثير من مكوناتها في نفس هذا المشوار البرلماني تتآمر مع مكينة قصر قرطاج في عمليات انقلابية أخرى .. ثم لأن الشق المدافع عن هموم الشعب و عن مستحقات الثورة لم يعرف كيف يبني مع غيره .. و لم يتمكن من كسب المعركة الاعلامية ، رغم الثقافة الرقمية المتاحة ... لكنها يمكن أن تتجه لطريق النجاح إذا أرادت ، وهي تعلم أين هو فضاء المعركة و طريق الإنتصار على إرادة الردة التي يقودها مجموعة مافيا قرطاج المدعمة بأموال الامارات .

أولا باش نكونوا واضحين، المقال هذا مكتوب على إيقاعات البندير. المشكل أنو توة ماعادش فاهمين الضرب على البندير منين جاي. قبل كيف واحد تجمعي يضرب عالبندير باش يلحّس لبن علي، نعرفو بكل وضوح الضرب عالبندير منين جاي و فين ماشي. توة اختلطت الأمور. فبحيث تنجم تسمع ضربة جديدة متع بندير ، بنغمة ركيكة و مرتعشة، يمشي فيبالك صاحبنا التجمعي متع هاكا العام و تقول بالكشي يديه كساحت شوية خاطر قعد مدة ما ضربش البندير هذاكا علاش النغمة مشي هي. لكن تتفاجأ إلي قدامك واحد عامل لحية خفيفة و إلا شلغومة ( وحدة منهم، المفيد شوية شعر في بلاصة مالبلايص) ولابس حوايج النهضة و يعزف في عزف منفرد على آلة البندير. يقول القايل لشكون يضرب في البندير هالسيد ال"محسوب على الحركة" ؟ البندير للنهضة و للقيادات متاعها زعمة ؟ ماو هذا المنطق آش يقول! قالك لا ، جماعة النهضة ما يستعملوهش بين بعضهم ، تنجم تقول موش في سبرهم ، و بيناتنا يتشائمو منو البندير، خاطر يفكرهم بحقبة مشومة، هذاكا علاش قياداتهم ما يقبلوش أنو تضربلهم البندير. أما هذا ما يمنعش أنو بعض المنتمين للنهضة عندهم موهبة في ضرب البندير. باهي لشكون يبندر هالنهضاوي الهُمام. بعد بحث طويل قامت بيه لجنة من الخبراء في العلوم السياسية و في علم الصوتيات و الإيقاعات البنديرية ، تبين إلي النهضاوي هذا ، و بصفة مفاجأة لكل التوقعات، قاعد يبندر لنداء تونس !!! الحكاية و ما فيها أنو النهضاوي تفكر اليوم بركة إلي هو عدو للجبهة الشعبية، و زادا إلي سامية عبو خايبة و ما تفهمش في السياسة و يلزم جماعة النهضة لكل يسبّوها. استنا لحظة .. ياخي موش النهضة تدعو لتوافق واسع مع كل الأحزاب وإلي الأحزاب لكل باهين و حلوين و مفماش كلمة أعوذ بالله بيناتهم، كيفاش النهضة تهاجم في الجبهة و في عبو ؟ موش يتناقض هذا مع التوافق ؟ صحيح يتناقض، أما اليوم بالذات يلزم نسبو الجبهة و نسبو سامية عبو ، على خاطر ... تي على خاطر ما قالوش كلمة باهية في قانون السبسي .. تي نقصد قانون المصالحة الإدارية، يعني يلزم نمرڨو فيهم (في المعارضين للقانون) باش البندير يمشي صحيح. باهي النهضة عندها مصلحة مالقانون هذا ؟ امممم .. الحقيقة النهضة ما عندها حتى مصلحة ، بالعكس القانون هذا ينجم يكون ضد مصلحة النهضة، فضلا على أنو ضد مصلحة البلاد. القانون هذا ما يستفيد منو كان التجمعيين و السراق. بالنسبة للموظفين، عمركشي سمعت واحد نهضاوي يخدم في إدارة اتهموه بالفساد المالي أو الإختلاس ؟ الحقيقة بعد الثورة الله أعلم أما الأكيد قبل الثورة كل النهضويين كانو يؤاخذون فقط بسبب الإنتماء، ولم أسمع بحالة واحدة يتهم فيها نهضاوي بفساد مالي أو إداري، هذا بالطبع إن تم قبوله في الإدارة أصلا و لم يطرد بسبب انتماءه. يعني هذا القانون لا ينفع النهضة بأي الأحوال ، بل بالعكس سيعيد أزلام التجمع إلى مراكز القوة كي يقمعوا النهضويين من جديد. يعني النهضة تجند أبناءها و تزج بهم لخوض حرب هي في الأصل ليست حربهم، بل حرب التجمع للإفلات من العقاب. يعني يخوضون حرب غيرهم بالوكالة، فيتجندون بالعشرات للتصويت كالقطيع على قانون لا ناقة لهم فيه ولا جمل. ثم يعلنون حربا إعلامية بنديرية، ضد كل من عارض هذا القانون بحجة أنهم جاهلون بالسياسة و أنهم لم يقرؤوا نص القانون. بل قطعان النهضة هم الجاهلون و الخائنون. حتى من قرأ نص القانون يعلم أنهم مدخل لإفلات السراق من العقاب و التشريع لقانون الغاب فلا يعود هناك حسيب و لا رقيب. هذه لعمري آخر صيحات البندير في بلادنا : نهضاويون يبندرون للندائيين. فلم تبندرون و علام أنتم فرحون و تهللون و تستبشرون، أ بنكبتكم تحتفلون ؟

المعارضة في تونس رغم حجمها الصغير فهي كعش الدبابير مزعجة

سؤال اخير : من يهاجم قانون المصالحة لا ينسق مع عرّابيه تحت الطاولة لتغيير الدستور و تاجيل الانتخابات ، اليس كذلك ؟ طبعا فالجبهة تنطبق عليها -وَإِذَا قِيلَ لَهُمْ آمِنُوا كَمَا آمَنَ النَّاسُ قَالُوا أَنُؤْمِنُ كَمَا آمَنَ السُّفَهَاءُ ۗ أَلَا إِنَّهُمْ هُمُ السُّفَهَاءُ وَلَٰكِن لَّا يَعْلَمُونَ (13) وَإِذَا لَقُوا الَّذِينَ آمَنُوا قَالُوا آمَنَّا وَإِذَا خَلَوْا إِلَىٰ شَيَاطِينِهِمْ قَالُوا إِنَّا مَعَكُمْ إِنَّمَا نَحْنُ
مُسْتَهْزِئُونَ (14) .