اللـــــــــــــــهم اني صائم

ملاحظة 1: وقع الالتجاء لاستعمال الدارجة للضرورة القصوى وحتى يصل المعنى كاملا

دون سابق موعد التقى مؤمن وصالح في يوم رمضاني

مؤمن: يا خويا ها الغيبة..والله توحشتك..أهلا بيك

ارتسمت على شفتي صالح ابتسامة صفراء: يا مرحبا يا مرحبا والله ليك وحشة (اش مطيحوا بي .....اللهم اني صائم)

مؤمن : آش عاملة فيك الدنيا يا خويا..انشالله تكون لاباس وبخير

(اختفت الابتسامة سريعا)
صالح: بربي اش من لاباس؟؟عاجبتك ها العيشة….؟؟دار وخدمة تطلع الروح ومرا وفروخ عيفوني في حياتي والله عفت روحي نخمم نهج ونخليهالهم واسعة وعريضة ولا نعمل سبة في روحي..استغفر الله اللهم اني صائم

مؤمن: استغفر مولاك يا ولدي كل كلمة محسوبة عليك..كان شفتني انا نشهق ما نلحق وزيد ربي بلاني بمرا حموم وفرخ عايق نخاف نوصل نهار نشدوا ندمدموا هو وأمو، خلي عاد هاك الخدمة .......نكلت نكلت على زوز فرنك والدنيا شاعلة فيها النار.واحد يحبو يخرجوه …...الله اني صائم وأكهو

صالح: أيا أخطانا ما تحيرلناش المواجع..بربي تتفرجشي في هاك المسلسل الفضيحة في الليل؟؟توة أحنا متاع الشي هذا؟؟مالقاو ما يحكيو على .......كان في ها الشهر الفضيل والعيلات ملمومة .شنية ها العرا والقرا وقلة الحيا ..يعن.....اللي خلق المسلسلات منين هبت ودبت ياخي عندنا أحنا ها الخنار
هذا...اللهـــــــــــــــم أني صائم

مؤمن: سمعت بيه سمع يا خويا ماك تعرف ما نرتاح كان ما نصلي التراويح كاملة ومن بعد نقرا شوية قرآن..ملا فضايح وملا رويق صدقني وليت نحشم نتفرج فيه قدام مرتي وهاك .... ولدي ..لا عاد حشمة لا جعرة اللطف ملا أمارك جايبينهم..قعدنا نخلصوا في التلفزة بش تعديلنا ها الخمج وهي ترقد عام كامل وتجي في رمضان وتسيب الما على البطيخ بسبوس وعرا وقلة حيا...اللــهم اني صائم ......

سكت مؤمن فجأة وجالت عيناه في كل تفاصيل جسد فتاة مرت بجانبه ترتدي لباسا يكشف الكثير من جسدها الغض..تبعه صالح وخيم الصمت على الأفواه وشيعا الفتاة بعيون مليئة رغبة وقلوب متحسرة
اللـــــــــــــــهم اني صائم

استدرج مؤمن حديثه: ملا أمارك مقلبة لا يحشموا لا يجعروا كان التزعبين و......شهر صيام وعبادة وهي مولات الدار موش هوني بربي وينو بوها وخوها راهي عاملة القهر هذيكة ..اللهم اني صائم وبرة

صالح: الشي زايد على قدام و.....ماشين ويكثروا..صدقني برشة منهم ها الشتل يجريو ورايا اما انا واقفلهم كي الشوكة لا تربية لا أخلاق والشي مفرت البرة قالوا تفتح وحرية...الله اني صائم

مؤمن : اخطانا توة........ربي يستر على بنياتنا..اش عامل في الخدمة؟؟

صالح : هاني ندبر في راسي الشهرية ماعادش تكفي وليت دورتها ضريبات خفاف أما وقفت في ها الشهر الفضيل نخاف ربي ونحب نصيموا على قاعدة بش يباركلي ربي في رزقي كان خلاونا ولاد الحرام اللي ماكلين الدنيا ومتسحرين بالآخرة..خلاولنا كان الفتفات

مؤمن: الله يبارك فيك ونعم المؤمن..انا كيفك الشهرية ماعادش تعمل شي وليت نبيع في كعيبات خلسة السترة باهية اهوكة نوقف البيع قبل شقان الفطر وبعد ما نصلي التراويح ونسبح شوية نبيع اللي كتب من عند ربي الدنيا صعبت والاسوام شعلت فيها النار

صالح: والله نعرف..خويا مؤمن يقولك اذا يحبلك ربي الشفا تلقى الطبيب في الثنية..نلقاشي عندك 50 دينار نرجعهملك آخر الشهر خوك مخنوق للعنكوش وكيما تعرف شهر فضيل واللي يعاون مومن يباركلوا ربي في فليساتو
تلون وجه مؤمن وبحركة لا ارادية ضغطت أصابعه بقوة على الأوراق النقدية المبعثرة في جيبه وزادت حرارة جسده ثم قال بعصبية واضحة: والله واللي اصطفى محمد لا عندي يا خويا..أقسم بربي ووراس ها الشهر كان جا عندي ما نشدش عليك ..ماك تعرف الدنيا لاهبة فيها النار ويزيدوك تفتوفة منا تشعل الأسوام منا..أيا خويا ما نعطلكش الاذان قريب يذن..بربي خلينا نعملوا قهيوة نحب نطير منك وحش

صالح : بطبيعة بطبيعة نطلبك ونعملولها قهيوة انا بيدي متوحش كلامك (… ...اللهم اني صائم)

مؤمن : وانت بالأمثل (ملا هم يعطيك دا مثقل دمو لصق ما سيب..فلوسو مكدسة جاي طامع في همي انا ..اش بش يقول الواحد..اللهم اني صائم واكهو)

رفع الأذان..لم تختلف طاولة افطار مؤمن في تقاصيلها عن تلك التي نصبت أمام صالح ..حتى ليخيل أنك أمام مأدبة عشاء تكاد تتهاوى من ثقل ما نصب فوقها...رددا على عجل نفس الجملة : اللهم لك صمت و على رزقك أفطرت ذهب الضمأ وابتلت العروق وثبت الأجر انشاء الله..وانهمكا في ارواء عطش البطون ..بعد يوم طويل من الصيام ..لا صوت فيه يعلو فوق ..اللهم اني صــــــــــــــــــائم

ملاحظة 2: تم تعويض الكلمات البذيئة وشبه البذيئة بنقاط احتراما لمشاعر الكثيرين
ملاحظة 3: مؤمن وصالح شخصيتان من صنع الخيال وكل من يرى نفسه في أحدهما فتلك مسؤوليته وليتحملها كاملة بدل الوعظ والارشاد

حمدي مسيهلي

Comments

6 de 6 commentaires pour l'article 29308

Adachrm (Tunisia) |Mercredi 25 Août 2010 à 12:20

@bilaw
أولا أنا لا أهوى تصنيف الناس أحكم على الظاهر والله يتولى السرائر
ثانيا صحيح وواجب الصحافي نقل ما يراه في المجتمع بسبياته وإجابياته ولكن عندما يقدم المقال بهذه الطريقة أقول أين الإجابيات وأين التوازن المطلوب فالصحافي يكتب لجميع الشرائح وكمواطن بسيط أرى أن الكاتب يدس السم في العسل. فلماذا هذه الأمثلة السيئة في شهر يبحث المرء فيه على تزكية نفسه. ألا يوجد من بيننا من يعطي هذا الشهر الكريم حقه.
ثالثا عندما أقول مقاهي وأسواق أنا لا أعمم أن كل روادها منافقون حاش لله مع أن السلوك السوي يفرض علينا تجنب إهدار الوقت في هذه الأماكن.
أخيرا العصمة لا تكون إلا لنبي كلنا خطاؤون ورحم الله إمرءا أهدى إلي عيوبي

Alerter

BILAW (Tunisia) |Mardi 24 Août 2010 à 14:22

@ adachrm
أولا دور الصحافة رصد إيجابيات الواقع و سلبياته و ها المقال مثال عن السلبيات الموجودة في الواقع
ثانيا إشكون قالك إلي المنافقين الزوز يمثلوا الغالبية من التونسيين فأنا قريت المقال كيقك و مافيهش ما يدل إلي مؤمن و صالح يمثلوا التوانسة الكل و الصحافي حمدي المسيهلي ما قالش هذا لا بالتصريح و لا بالتلميح
ثالثا أنت اعتبرت مؤمن و صالح من المنافقين و هذا يعني إلي هوما ينجموا يكونوا من الصائمين و من قراء القرآن و من رواد المساجد و التراويح هذا في الظاهر و لكن يقوموا بأشياء محرمة في الواقع و من تحت حس مس . ما لا علاش هوما منافقين و أنت بنفسك سميتهم منافقين
رابعا قلت إلي هذي النوعية من الناس يمكن أن تجدهم في المقاهي و الأسواق يعني أنت تعترف إلي الفئة هذه موجودة في تونس على خاطر القهاوي و الأسواق موجودة في واقعنا و ماهيش موجودة في المريخ و إلي يمشيولها يعيشوا معانا هوما جارك و جاري و قريبك و قريبي و صديقك و صديقي و زميلك و زميلي و غيرهم
خامسا زعمة الكل هاذوما إلي يمشيو للأسواق و القهاوي ما يعرفوش ربي و ما يصليوش و ما يقراوش القرآن و هوما منافقين و في النهاية ما همش مسلمين
سادسا قلت في تعليقك حرفيا "يمكن أن تجدهم في المقاهي والأسواق صحبة أمثال هذا الصحفي الذي ينقل حوارهم" و هنا نقلك عيب عليك و ما هوش باهي أبدا حتى تهين الصحافي و تحتقره و تتكلم عليه بهذه الطريقة من السخرية و الاستهزاء و تحطوا في زمرة المنافقين إلي تحدث عنهم في مقاله ـ ياخي أشكون حطك تفرق في التقوى و الفضيلة على الناس في ها الشهر الفضيل . زعمة سيادتك ما ارتكبتش ذنب وقت إلي أنت تتحدث عن صاحب المقال بالطريقة هذي . راه الصحافي يحاول ينقل إلي يراه و إلي
يسمعو و ماهوش بالضرورة إلي هو يتبنى ما يقوله و يؤمن بيه و يعمل بيه و يدعولو و حتى إذا خالط ها النوعية من الناس فما يعنيش هذا إلي هو منهم . ما لا الصحافي إلي يعمل تحقيق على عدد من المجرمين هو مجرم و إلي يعمل تحقيق على المخدرات هو يتعاطى المخدرات و إلي يعمل تحقيق على الغش هو غشاش و إلي يتحدث على السرقة هو سارق
سابعا إذا تحب تعلق علق على المكتوب في المقال و علي قالوه الشخصيات الموجودة فيه أما الكاتب فخليه على جنب و ما توجهلوش تهم على خاطرك تولي تعمل في إثم و ما ظاهرلي تحب ترتكب إثم في ها الشهر الفضيل
ثامنا المقال ما اتهمش ديننا الحنيف أن العيب فيه مثلما قلت أنت ، فالشيء منطقي جدا فإذا كان الواحد ما التزمش بتعاليم الدين فهذا ما يعنيش إلى الدين مقصر و العيب فيه و إنما العيب في إلي انتمى إلى هذا الدين و ما طبقش تعاليمه السمحة و كان منافق و الله يهدي ...

Adachrm (Tunisia) |Mardi 24 Août 2010 à 12:26

سبحان الله, هل دور الصحافة الآن أصبح يقتصر على رؤية العيوب وهل هذان المنافقان يشكلان الغالبية من التونسيين, المقال جد سيئ ويبطن الكثير من المغالطات عموما هذه النوعية من الناس لا تكون لا من الصائمين و لا من قراء القرآن ولا من رواد المساجد والتراويح. يمكن أن تجدهم في المقاهي والأسواق صحبة أمثال هذا الصحفي الذي ينقل حوارهم.
.إن لم يفهم الإنسان تعاليم دينه فليس العيب في الدين وإنما في عقل هذا الإنسان
تقبل الله صيام الجميع