---

---

- غلق كل قنوات الإخوان و إيقاف كل من فيها : فهمت يا لطفي زيتون يا متع القائمة السوداء؟

- الإيقاف الفوري و الحالي دون جريمة و دون إذن قضائي لكل قيادات الإخوان : فهمت يا ديلو يا متع العدالة الإنتقالية؟

- إعادة تعيين مدعي عام مبارك : فهمت يا بحيري يا متع إستقلال القضاة؟

- تفريق ميدان رابعة العدوية بالرصاص في وحشية لم يستعملها مبارك : فهمت يا مورو يا متع فمة تجمعيين نظاف؟

- منع الإخوان من العمل السياسي فورا و تحذير شديد اللهجة لحزب النور بعد ما خدمو بيه : فهمت يا جبالي يا متع لا للإقصاء؟

- فتح أرشيف الإخوان و نقل وثائقهم : فهمت يا عريض يا متع ما نفتحوش أرشيف الداخلية؟

- من تركهم الإخوان من الفلول في مفاصل الدولة تقلبو عليهم : فهمت يا معين الشاذلي العياري؟

فهمتو؟ هذا الكل في أقل من 24 ساعة ! فهمتو كيفاه تحصن الثورات
إن شاء الله فهمتو! خاطر وقيت!

مزال ما فاتش الفوت.. و ممكن تحصين الثورة التونسية

العاقل من إتعض بنفسه : هاكم شفتو إش صار فيكم في التسعينات، الذكي من إتعض بغيره : هاكم شفتو إش صار في مصر، و البهيم من بعد هذا الكل مزال طامع في العسل من التجمعيين النظاف

لن نسمح لسذاجتكم و تقصيركم و بهامتكم أن تقتل أحلامنا في دفن الماضي الكريه

و إنتوما؟ عبو و المرزوقي و العيادي؟ فرحانين؟ شايخين؟ هاكم قسمتو و تقسمتو و وليتو الكل زعماء! ماكمش بش تفيقو كان موش بش يجمعكم رأي و موقف واحد فقريبا جدا، ستجمعكم زنزانة واحدة

و إنت يا مواطن يا بسيط، يا الي جد عليك تفليمهم

ريت النخب الي زعمة خايفة م الدكتاتورية كيفاه طلع تفليم : تصفق لدكتاتورية العسكر و تلحس في الجزمة العسكرية؟

ريت النخب الي زعمة خايفة على حرية التعبير كيفاه طلع تفليم : تصفق لدكتاتورية العسكر و كلمة لا على غلق القنوات الفضائية؟

ريت النخب الي زعمة متع فصل الدين على السياسة كيفاه طلع تفليم و شارية شيخ الأزهر و تتاجر بالدين

ريت النخب الي زعمة متع خايفة من العنف كيفاه كلمة لا على الكرطوش الي يخيط في كل من عنده لحية؟ كيفاه كلمة لا لما ملتحي نهشت فيه الخناجر

ريت النخب الي زعمة متع لا للإقصاء حتى كلمة على إيقاف قادة الإخوان

ريت كيفاه الأحزاب الي زعمة ديمقراطية فرحانة بتكسير الصندوق

ريت كيفاه الأحزاب الي زعمة يسارية و شيوعية و ماركسية و متع الزواولة كيفاه تتحالف مع الإقطاعيين و الكمبرادور و سراق الشعب

ريت كيفاه العروبيين و الناصريين و متع الأمة العربية و هاك الخروطو كيفاه يحكي بإسمهم البرادعي مهندس غزو العراق

ريت كيفاه الي زعمة جايبنها سيادة وطنية و غنايات قطر، طلعو غلمان آل سعود

ريت كيفاه إعلام فاسد، بالدوام الي ينقب الرخام، يردك إنت المواطن تحت صبعك في عينك و تنقلب على نفسك و تحطم أحلام ولدك و تحط دبابة على رقبتك.. و إنت فرحان

فهمت الي لا ديمقراطية لا عروبة لا عنف لا حرية تعبير لا سيادة وطنية : الكلها تفلم، الكلها تكذب، ريق يغنيو فيه و في أول تجربة يوريو الي هوما نقيض ما يدعون

فهمت الي الصراع ساهل ياسر : صراع طبقي، بين الي طول عمارهم يحكمو، يسرقو ينهبو، يعذبو، الي عمرهم ما آمنو بالديمقراطية، دايرة بيهم طبقة نخب فاسدة و متمعشة متشبعة بعقلية كولونيالية تحتقر الشعب

قامت عليهم ثورة ولد الحفيانة و ولد العريانة

سيبو النخب المتمعشة تغني بكلام كبير، ما يمنوش بيه، باش ولد الحفيانة ينقب عين ولد العريانة، و الزوز يرجعو الحكم لجلادهم الزوز

فهمت؟ وقيت تفهم.. خاطر كان ما فهمتش تو، على قريب إنت و ولدك تصفقو في شعبة

لا أرى حلا إلا تحصين الثورة التونسية على طريقة الجيش المصري، مادام ذلك ممكنا.. و بالعنف اللازم! الأحلام و الأجيال القادمة و الديمقراطية.. شراتها الشعوب الي حصلت عليها بالدم، موش باش ناخذوها أحنا بالحب و التسامح