شعبان عبدالرحيم لبوش: تستاهل ألف جزمة

قرر المغني الشعبي المصري شعبان عبدالرحيم أن يحتفي على طريقته بالصحفي العراقي منتظر الزيدي الذي قذف الرئيس الأمريكي جورج دبليو بوش بحذاءيه، وقرر عبدالرحيم إصدار أغنية جديدة عن الحادثة التي تصدرت عناوين الأخبار العربية والدولية، وتحمل الأغنية التي كتب كلماتها الشاعر الغنائي إسلام خليل اسم (تستاهل ألف جزمة) يعبر خلالها عن سعادته بما حدث للرئيس الأمريكي الذي دمر العراق وكان سببا في توتر العالم كله، وتقول كلمات الأغنية وهي بالعامية المصرية:

خلاص مالكش لازمة يا بوش يابن اللذينا

تستاهل الف جزمة عاللي انت عملته فينا

وجه اليوم يا واطي ووشك اتفضح

وشافوك الناس مطاطي من جزمتين شبح

الجزمة كانت مفاجأة كمان زي الزيارة

والدنيا بحالها فرحت والناس فضلت سهارى

يا قلوب كتير حزينة قومي يلا ابتسمي

شوفي بوش وهو خايف والجزمة بتترمي

بصراحة ماقدرش اغشك واقولك زعلت عليك

يا ريتها جت في وشك وخزقت عينيك

صدام اللي انت دبحته في اول يوم العيد

اهو ربك خد بتاره وفي نفس المواعيد

تحية عشان منتظر وتحية لجزمته

فرحنا كتير في بوش في اخر خدمته

بجزمتين في وشك هاتسيب امريكا على نارك

ويا عيني مش هاتلحق يا بوش تاخد بتارك

في ناس كتير بسببك في الدنيا متبهدلة

بتقول يا ريتها كانت صاروخ او قنبلة

العالم كله شافك وبالسعادة حس

الجزمة زي الكورة وداخلة في المقص

مليون شهيد واكتر في الجنة فرحانين

ربك كبير وقادر يهد المتفرعنين

ضيعت شعوب كتيرة من هنا ومن هنا

ومش خسارة فيك جزمة معفنة

و ايــــــــــــــــــــــــــــــــــــه

يذكر أن شعبان عبدالرحيم كان قد اشتهر بأغانيه ذات الطابع السياسي والتي يؤديها بطريقته العفوية المعهودة، خاصة أغنية أنا بكره إسرائيل التي ذاع صيتها حتى أن قناة سي إن إن الأمريكية أجرت حوارا مطولا معه آنذاك.