أنا لست مع نظرية المؤامرة !!! لوبانه يمضغ فيها باستمرار أهل السياسة و المهتمين بالشأن العام.. تذكّرني في حكاية الذيب و سارح الغنم.. السّارح يسيّب في مساطتو..باش يثير اهتمام أهل قريتو.. يقوم يصيح و يستغيث.. إلّي الذيب هجم على السّعي باش ياكلهم.. تفزع الناس على كذبة.. مرّه واثنين و عشرة ..جاء النهار إلّي هجم فيه الذيب.. قام السارح يولول و يستنجد..لا حياة لمن تنادي...مخ الهدرة.. إلّي شعوبنا في المنطقة العربية تحاك ضدها مؤامرات خطيرة من الدّاخل و الخارج و ماهيش تستشعر في الخطر بحكم التضليل و التواطؤ السياسي و الإعلامي.. هاذي حكام طغاة مستبدّين .. جهلوا شعوبهم وغرقوهم في التخلّف و الظلامية و نهبوا ثرواتهم... بعد ما دمروا العراق التاريخ و الحضارة..جاء دور سوريا التاريخ و الحضارة..و توّه ! بعد ما دمروا سوريا باسم الدفاع على الديمقراطية !!!!!!!! بما أن مشيخات الخليج هي واحات للحريات و حقوق الانسان و مثال للديمقراطية.. و يلزم يفرضوا المبادئ و القيم الكونية هاذي و لو بحد السّيف..تلفتوا لليمن التاريخ والحضارة باش يأدبوه و يخضعوه لمشيئتهم باش يولّي كيفهم.. لاعب متآمر و عميل في المنطقة..جارهم الفقير إلّي رفضوا يقبلوه معاهم في مجلس التعاون الخليجي.. ارتكبوا بحقّه مجازر فظيعة.. جربوا فيه الأسلحة الامريكية المحضورة و أنواع متاع أسلحة أول مرّه تتجرّب.. و دمروا الشويه إلّي عندو من مكاسب الشعب في بناه التحتية و منشآته الحيوية و إرثه الحضاري العظيم.. قلّك شماته في إيران النووية الشيعيّه !!!!!!!ما تنساوش إلى صار قبل في الجزائر في التسعينات و مازلوا يتآمروا عليها.. و هاذي ليبيا دمروها و يحبوا يقسموها.. ولاّة بؤرة و مصدر للإرهاب و خطر محدق على تونس و مصر و الجزائر.. واحنا منين جانا الإرهاب!!؟ آش قاعد يصير في منطقتنا واحنا نتفرجوا مْبَهْمين !!؟كنا عايشين في وئام و تسامح.. مسلمين و مسيحيين و يهود و سنّة و شيعة و أكراد و أمازيغ... فسيفساء غنية و جميلة.. تجمعنا مصلحة وحده و مصير واحد و عايشين في أمان الله.. شنوّه إلّى تبدّل !!؟

---

---

احنا قاعدين نتعرضوا لمؤامرة كبرى.. باش يزيدوا يقسموا المقسّم و يمزقوا مجتمعاتنا بالفتن و يزيدوا ينهبوا ثرواتنا...فمّه توانسة للأسف الشديد تحت وطأة الدّجل و الشعوذة مازالوا يتبناو في خطاب التضليل و الدّمغجة.. و فتاوى بول البعير ..ويتفرجوا بسذاجة منقطعة النظير في قنوات التخلّف و الارتزاق ..الجزيرة و العبريه و عِد ايديك من قنوات الحقد و التحريض على الفتنةالجماعات الارهابية هاذي.. القاعدة و أنصار الشريعة و النصرة و داعش شكونهم ...!!؟ شكون صنعهم !!؟ شكون درّبهم !!؟ شكون موّلهم !!؟ شكون قتل شكري الله يرحمو!!؟شكون قتل البراهمي الله يرحمو !!؟ شكون قتل جنودنا و أمنيينا و بكّى أمهاتنا و آباءنا !!؟

انشاء الله ما تكونوش نسيتوا يا توانسه.. لعبوا كيف ما حبوا باعصاب التوانسه باستعمال ورقة نذير و سفيان.. ربي يتولاهم برحمتو عايشين ولاّ ميتين.. على خاطر لقاو دولة ترقل و تهرقل موش عارفه كوعها من بوعهاأحنا مصيرنا في يدينا و سلاحنا في وعينا و وحدتنا و تضامنا و يقضتنا و محبتنا لبلادنا..من غير خوف.. و لا عاش في تونس من خانها
عود على بدء.. السّارح و الذيب هوما سبب البلاء.. بتآمرهم وانتهاجهم سياسة فرّق تسود لتأبيد الاستعمار..يحرضوا فينا على الفتنة و الكراهية و العنف بين بعضنا.. باش يستنفعوا وحدهم ب الزبدة و فلوس الزبدة .