علاشْ يُجمع كل المسؤولين السابقون و اللاحقون على سياسة – الترقيعات – و زينة المداخل و السّاحات و – يا مزيّن من برّة ...- و لا يعالجون المشاكل الكبرى و لا يفتحون الملفّات الحارقة و لا يقربون – أبدا - المشاريع المجمّدة ؟؟

---

---

المواطن الذي يسكن هذه المدينة ( السّاحليّة على الخريطة فقط ) أصبح يعيش في جوّ يوتّر الأعصاب ، بل يقتلعها أصلا ، أينما حلّ يجد أكوام الفضلات و الزبالة تحاصره ، الروائح الكريهة تترصّده و أدخنة السيارات و المعامل ، الضجيج ، الإكتظاظ ، الضّيق والمضايقة زائد بلاوي مصنع الموت ( السّياب ) و مشتقّاته .

مع هذا الجوّ الخانق ترتهن الحياة اليومية لأكثر متساكني صفاقس لظلم الذين يضطرّه العيش التعامل معهم قسرا ،، ظلم التّاكسيست الذي يتعامل مع الحريف بفضاضة و على كيفو هو وبس ، ظلم مستعملي الطريق و أصبح قانون الغاب هو اللي يسيّر حركة المرور بعدما ضربوا عرض الحائط بقواعد المرور و ذراعك يا علاّف و هات من لغة الإسفاف و السبّ و الشتائم و السلوكات المشينة ، ظلم الخبّاز ، الخبّاز اللي أصبح ( يكعور و يعطي للأعور ) و يخرّج في خبز حتى الحيوانات تعزف عن أكله و يخدم وقت اللي يحب و يبطّل وقت اللي يحبّ و لا رقيب عليه ،،،، ظلم الجزّار و بائع السّمك و العطّار و الطريفة اللي ترضخ لهواهم فقط ، ظلم قطاع - الخدمات العامّة - مثل الكارْ اللي عمرها ما تجي في وقتها ، ظلم ديوان التطهير اللي – يسوني و ما يجاوبشْ – و إذا جاء لا يفعل شيئا ،،، ظلم السبيطار و المواعيد الخيالية و الخدمات المتردّية و الآلات المعطّبة و الدواء الغير موجود و لغة تحبّش تعدّي بالفلوس ،،،
ظلم (( البانديّة )) الذين صاروا يتحكّمون في قوت المواطن اليومي في الخضرة و الغلّة و سوق الحوت و هم يشكّلون قنابل موقوتة قابلة للإنفجار في وجه كلّ مواطن يحتجّ على الغشّ و رداءة البضاعة او على السرقة في الميزان ، طبعا في ظل انعدام (الحضور الفاعل) للأمن أو الرّقابة أو المراقبة الإقتصاديّة و الصحّيّة إلاّ من بعض الحالات الإستعراضيّة الوقتيّة و المعلومة مسبّقا و الغريب أن هذا القطاع لا يقوم عليه و لا يشغله إلاّ هذا الصّنف من النّاس قصدا ،،، و ها البانديّة تلقاهم مزرّعين في كل محطّة ( على فكرة قريب تولّي 90 في ال100 من صفاقس محطّات عشوائيّة بمقابل ) تلقاهم متجهّمي الوجوه ،عديمي المنطق كافرين بالحوار و طيّب الكلام و عندهم ((قانون خاصّ)) كالسيف مسلّط على الرقاب - طبعا بلا وجه حق - يثيرون الخوف و الهلع ... يقول القايل خرجنا من مشروع المناطق الزرقاء طحنا في ما هو أتعس ..!

أهل صفاقس تعبوا و فدّوا و ضجروا ، تعبوا ممّا يعايشون قسرا ، فدّوا من اللغة الخشبيّة التي يزركشها المسؤولون في سفسطائيّة و وعود لا تنجز و ضجروا من وضع صار مزمنا لا أمل و لا انفراج فيه على الأقلّ على المدى القريب .

أهل صفاقس يسألون و يتساءلون ما جدوى و ما الحكمة في ( تقليعة ) تنصيب الصّمبات في الشوارع و السّاحات ؟ و من أين جاءت الأموال المرصودة لهكذا ترف ؟ و هل انتهت كلّ مشاكل صفاقس حتّى نطلب الرّفاه في الفعل البلدي ؟؟؟ أليس من المعقول أن تتدرّج البلديّة و من يماثلها من السلط الجهويّة في تنفيذ التّصوّرات في أولويّات ؟؟

أليس من الكياسة و حسن التصرّف و التدبير أن تُصْرف هذه الأموال و أن تصَرّف هذه الطاقات إلى ما ينفع البلاد و العباد ؟؟ و الفلوس الماشية للصّمبة الإصلاحات أولى بيها !؟؟؟