الفريجيدار زادة عندها ميزة أخرى ،،، ميزةْ أنّها الحاجة الوحيدة اللي يجمعوا عليها و يتلاقاوْا عندها كلّ أفراد العايلة التونسيّة على مختلف هواياتهم و مشاربهم سواء متغششين و إلا فرحانين.

---

---

واحد فدْلاكجي.. مرّة حكالي ، قالّي في العطلة الصيفيّة الفايتة ،،، عندي ولدي قعدت تقريبا شهرْ ما شفتوش ، أنا نخرج للخدمة نخلّيه راقد ،،، و كي نرجع في الليل موخّر نلقاه في بيتو مسكّر عليه ، إمّا راقد و إلاّ على الفيس بوك ،،، أهو ليلة عطشت قمت نعمل في شريبة نلقى الوليّد بحذا الفريجيدار ، قال من الفرحة نقّزت عليه حضّنتو ،،، وحمّلتوا مليييح و قلتلوا وييينك يا وليدي توحّشتك ،،،، الوليّد تأثّر بالموقف ياسر ، هبّط راسو و شدّو البكاء.

الفريجيدار بصفة عامّة أشكال و أنواع زادة ،،، ثمة فريجيدار صغيّرة قدّ أُمّاليها و ساعات اللّي فيها ما يخلّصشْ قيمة الضّوء اللي تمشي بيه ، و ثمّة فريجيدار كيف متاع مسرحيّة الواد سيّد الشغّال ، فريجيدار توكّل بلاد كاملة ، تحوّس فيها براحة ،الحوت بالطّارات و اللحم بالسّقايط و الخضر و الغلال بالقاجوات ... و ثمّة الفريجيدار متاع (الهايْ سوسايتي و الفينو) تلقى فيها أطعمة متاع ريجيم ،، شويا خضرْ بيولوجيّة ...و غلال و فواكه عادة متاع بلاد برّة على شويّة مشروبات غازيّة لايت و إلاّ حتّى ما يعادلها.
أما بصفة خاصّة تلقى فريجيدار العائلة الشعبيّة التونسيّة ( typique ) و فيها مكوّنات تقريبا ( standard) ،،،، تحلّ باب الفريجيدار تلقى ( base ) ... من فوق دبّوزة سيرو متاع كحّة و شويّا دوايات متاع سخانة ،،، بحذاهم حويرة عظم ،، تحتهم شطر قارصة ، كعيبات صلامي ، حكّة هريسة محْلولة ، باكو حليب و زبدة و إلاّ معجون ،،، من بعّد تلقى برشا دبابس متاع قازوز ،،، كلّ أنواع القازوز و كلّ أسماء القازوز لكن داخلهم معبّين بماء الماجل ... و يمكن تلقى زادة دبّوزة روزاطة على ما ياتي ....يجيش ضيف على غفلة .!
لْداخل ...تلقى فواضل الجمعة ، صحن ملوخيّة ، كسرونة مقرونة ،،، صحفة بسباس و إلاّ طبيخة ،،، و طبعا لوطا تحتهم تلقى ساشيات الخضرة.
أما القلاسيارْ ،،، هاكي عادْ حكاية أخرى ،، القلاسيار يا سيدي غالبا تكون مرصّفة و معبّية بحكك متاع قلاص ..على كلّ لون يا كريمة ....و على كلّ المذاقات، لكن من داخل تلقاهم معبّين بالفول و الحمص و الجلبانة ،،،، معاهم زادة شويا لحم مفروم و إلاّ إسكالوب ،،، و ما يجيكش عجب كان تلقى فاضل دوّارة عيد عمناولْ ، أما إذا كانت المرا دبايريّة. و مغرومة بالروساتات وقتها تزيد تلقى دبيبسات متاع عصاير القارص و إلاّ الفراز.
حاصيلو تقريبا هذا حال فريجيدار أغلب العايلات التونسيّة ،، و ما تحفل و تزهى كان في شهر رمضان، اما في العيد الكبير وقتها بالحقّ ...الفريجيدار التونسيّة يرجعلها الإعتبار!!!
مستمعينا ، كلمتنا اليوم عبارة عن صورة كاريكاتوريّة ، لكن حديثنا وراه غصّة كبيرة و برشا وجيعة ،،، برشا وجيعة يحسّها السّواد الاعظم من التوانسة . شوفوا وين وصل مستوى العيش متاع التونسي ،، توّا ماعادش نحكيوا على غنّاية ( العيش الكريم ) ، ولّينا حتّى العيش حاف صعيب ، و صعيب ياسر ،،، و الحكومات المتعاقبة أثبتت فشل ذريع في إصلاح الوضع الإقتصادي . و باش نوضّح راهو اللي حكيناعليه يهمّ الطبقة المتوسّطة ، ايه نعم الطبقة اللّي المفروض تكون الطبقة المترفّهة ، أما ....آش حال اللي ما عندوش فريجيدار خلاصْ و حالتو مِتعبة أصلا ؟؟؟
ربي يقدّر الخير